ASOCIACIÓN MULLERES SALGADAS

 Asociación Mulleres Salgadas, Sandra e Dolores, dentro do programa de radio escolar (Ferraganchos, 10.40 - 11.30h -3º EP). AGARESO e Fundación Ayuda en Acción.

XII DÍA DAS RAPAZAS NAS TIC

 

O próximo xoves, 25 de abril, o Centro de Supercomputación de Galicia, a Secretaría Xeral de Igualdade e o Colexio Profesional de Enxeñaría en Informática de Galicia organizamos o "Día das Rapazas nas TIC" (Girls in ICT Day), dirixido especiamente ao alumnado do último ciclo de centros de primaria e secundaria de Galicia. Este ano contamos tamén coa colaboración do CITIUS (Centro Singular de Investigación en Tecnoloxías Intelixentes da Universidade de Santiago de Compostela). O Día das Rapazas nas TIC é unha celebración a nivel internacional, orientada a motivar ás novas xeracións de mozas para que vexan as posibilidades e atractivo do ámbito das tecnoloxías para o seu desenvolvemento académico, investigador e profesional. Aquí está toda a información do movemento a nivel internacional. https://www.itu.int/women-and-girls/girls-in-ict/ Para celebralo, ese día no CESGA teremos dúas actividades, unha, virtual, para todos os centros de Galicia e outra, presencial, para alumnado dos centros próximos a Compostela: COLOQUIO VIRTUAL DE TECNÓLOGAS GALEGAS CO ALUMNADO DOS CENTROS EDUCATIVOS Un coloquio virtual dende centros educativos por streaming con 4 destacadas galegas emprendedoras, investigadoras e tecnólogas no eido das TIC, ás que o alumnado participante dos centros galegos de secundaria poderá coñecer a súa traxectoria previa, o día a día do seu traballo, preguntar calquera dúbida sobre este eido profesional ou as motivacións persoais que as levaron a traballar neste eido. A apertura institucional do evento será ás 10:45, e o coloquio comezará as 11:00 ata ás 12:30.

OBRADOIRO DE ILUSTRACIÓN CON ANXO FARIÑA

 Diversimonstros 

1º+2º EP 10:00-11:00

Diversimonstros 

3º+4º EP 12:00-13:00

A cidade violeta 

5º+6º EP 13:00-14:00

Saída á Casa Grande de Xanceda

 Saída prevista para o mes de xuño

Quen teña honra que me siga!

Con esta frase de María Pita, o alumnado de 5º e 6º de Educación Primaria descubriu hoxe a importancia que tivo o Castelo de Santa Cruz na historia defensiva da ría da Coruña. Ademais, aprendemos sobre a vida de Emilia Pardo Bazán quen mercou o castelo para usalo de residencia de verán, pagando só 2 bois! 

Coñecemos que a filla de dona Emilia, ao enviuvar, decidiu doalo para os orfos e orfas da Guerra Civil, converténdose durante case 40 anos na vivenda de centos de nenos e nenas.

Actualmente o castelo é a base do CEIDA, sendo os seus biólogos quen nos fixeron o percorrido pola illa, amosándonos non só a súa historia, senón toda a natureza que atopamos nela. 

REUNIÓN OBSERVA-ACCIÓN: PREPARACIÓN DA MEMORIA FINAL

 Mércores 18 de abril 2024.

Xa efectuada a visita ao CEIP Pintor Rosales de Madrid no mes de marzo 2024, e exercido como anfitrións recibindo ás docentes deste centro madrileño a pasada semana, temos agora como cometido tratar de marcar os puntos de actuacións para realizar unha memoria final que serva para avaliar estes meses de traballo dentro desta III Fase do programa Obsera-Acción. 

-Rúbrica de avaliación

-Aula Virtual Centro Formación

-Elaboración produto audiovisual

ESCRITA CREATIVA EN GALEGO: III CONCURSO DE MICRORRELATOS

 Cara a celebración do día do libro o equipo da Biblioteca e o EDLG lanzamos o III Concurso de escritura creativa de Microrrelatos.

A través del podedes  deixar voar a vosa imaxinación e trasladarnos  a vosa creatividade. 

Poderán participar o alumnado dende 5º de EP ata 4º de ESO.

      Aquí podedes consultar as BASES.  ANIMÁDEVOS A CREAR!!!

III CONCURSO DE MICRORRELAT... by yolick20003194

FÁLAME DA EMIGRACIÓN

Venres 12 de abril 2024. Biblioteca Castelao e UUMM

Este venres recibimos no CPI Virxe da Cela a un grupo de persoas maiores que viñeron falarnos das súas experiencias na emigración a Europa e a América. Os rapaces e rapazas de 4º de ESO realizaron preguntas relacionadas co proxecto de "A miña familia no século XX" que están a elaborar na materia de Xeografía e Historia e os nenos e nenas de 4º de EI preguntaron sobre os oficios que desempeñaban e cuestións que lles chamaron a atención sobre as viaxes que fixeron. Ao remate, todos xuntos, degustamos unha pequena merenda na Aula de Usos Múltiples. Foi unha experiencia interxeracional totalmente enriquecedora!

Rosa Cabana Sande (emigrada a Francia), Ezequiel Juan Luís Guntín Vázquez (emigrado a Arxentina e República Dominicana) e Mª José Varela Quintela (emigrada a Suiza), acompañadas por Teresa Alonso, do Espazo+60 de Afundación de Pontedeume. 

NÓS SOMOS ELAS

O Equipo de Dinamización da Lingua Galega e as participantes no programa Donas de si, queremos convidarvos a desfrutar da exposición itinerante "Nós somos elas" que cedeunos temporalmente a Deputación da Coruña. A mostra consta dunha serie de fotografias nas que se recolle a esencia do mundo rural e mariñeiro e póñese en valor a importancia da presencia feminina tantas veces silenciada. As instantáneas, pertencentes ao Arquivo Vidal, acompáñanse das verbas de poetisas contemporáneas para dar máis forza ás imaxes.  Esta mostra estará no centro ata o próximo día 22 de abril 2024 e podedes atopala na biblioteca e no corredor da planta baixa do edificio de secundaria.

A mostra "Nós somos Elas", da área de Igualdade da Deputación da Coruña e a AC Alexandre Bóveda, quere poñer o foco nas mulleres, retratadas no seu ámbito privado e laboral polo histórico fotógrafo de Laxe e con voz propia asinando os textos cos que dialogan as imaxes. Mulleres acompañadas dos seus fillos e fillas son os conxuntos máis repetidos nos 24 retratos seleccionados do Arquivo Fotográfico Vidal, concretamente de José Mª Vidal, da colección permanente do Museo de Mar de Laxe. Son pezas do pasado e do presente que constrúen un relato diferente, inclusivo, que trae ás mulleres a ocupar o seu lugar na historia, a facelas protagonistas e visibilizalas". O arquivo está composto por máis de 67.000 imaxes, realizadas dende finais do século XIX ata finais do século XX, polos fotógrafos locais José María Vidal -de quen son a totalidade das imaxes da mostra- e o seu pai Plácido Vidal. Os Vidal foron retratistas da vida cotiá de Laxe e toda a comarca e non houbo acontecemento social que non pasase polas súas cámaras. Festas, procesións, concentracións deportivas, actos relixiosos, personaxes populares, visitantes ilustres, nada escapou ao seu obxectivo. 

Ana Romaní, Antía Otero, Berta Dávila, Chus Pato, Clara Vidal, Dores Tembrás, Eli Ríos, Emma Pedreira, Estíbaliz Espinosa, Eva Veiga, Helena Villar Janeiro, Lucía Aldao, Lucía Novás, Luz Pozo Garza, María do Cebreiro, Marica Campo, Marta Dacosta, Medos Romero, Mercedes Queixas, Miriam Ferradáns, Olga Patiño, Pilar Pallarés, Rosalía Fernández Rial e Yolanda Castaño son as poetas que participan na mostra, poñendo palabra ás imaxes de José María Vidal.

CASTAÑADA ARRUINADA

 O alumnado de 1º da ESO na materia de Proxecto Competencial elaborou este arrepiante podcast titulado "Castañada Arruinada". Baseado nun relato escrito por alumnado e familas do CPI Virxe da Cela para o certame de relato curto "Relatos de medo", organizado polo EDLG (Equipo de Dinamización da Lingua Galega) en colaboración coa Biblioteca Escolar Castelao con motivo do Samaín 2023.

CPI VIRXE DA CELA ANFITRIÓN: III FASE "CONECTA"

 Mércores 10 e xoves 11 de abril 2024

ÚLTIMOS PREPARATIVOS PARA A VISITA DUN GRUPO DE DOCENTES DE MADRID

 luns 8 abril 2024

REUNIÓN PLANIFICACIÓN VISITA CEIP PINTOR ROSALES

 Xoves 4 abril 2024. 13:50. Aula Ferraganchos. A menos dunha semana de recibir a visita do grupo de docentes do CEIP Pintor Rosales de Madrid, o profesorado do CPI Virxe da Cela que forma parte do programa Observa-Acción ultima os preparativos para o acollemento: horarios, observacións, xestión de espazos, reparto de tarefas, xantar, etc. Sabemos que en equipo todo é máis doado, e queremos deixar todos os cabos ben atados para que os próximos mércores 10 e xoves 11 de abril o noso centro abra as portas as estas xornadas de observacións que revertirán, indudablemente, nunha mellora das nosas prácticas educativas.

DÍA DAS ARTES GALEGAS 2024: FRANCISCO ASOREY

Con motivo da conmemoración do 1 de abril, Día das Artes Galegas 2024, o profesorado de diferentes centros escolares coruñeses elaborou un interesante material para dar a coñecer a figura e o legado do autor homenaxeado este ano, o escultor cambadés Francisco Asorey. O traballo inclúe unha unidade didáctica e varias actividades interactivas en formato Genially.

Asorey Artes Galegas 2024 by veracruces on Scribd

4º EI: PROXECTO SOBRE A HISTORIA FAMILIAR A TRAVÉS DA FOTOGRAFÍA DOCUMENTAL

Bo día familias. Neste trimestre estivemos a traballar a familia a través da fotografía documental dos nosos alumnos/as.

Primeiro, fixeron unha árbore xeneralóxica sobre a súa familia, explicando os seus membros, a súa relación e falamos dos diferentes tipos de familias. Para fomentar a narrativa visual, creamos monicreques con fotografías dos seus familiares e elaboraron unha historia nun teatro de sombras.

Logo, con fotos antigas sobre o seu seo familiar, as familias relataban quen eran os seus antepasados. Despois, eles mesmos explicaron isto para os seus compañeiros e a comunidade educativa dende Radio Xesteira. A continuación, adxuntamos a ligazón para que poidades escoitalos de forma detallada, son uns faladores/as!

Audios 4º EI - Radios Xesteira 

 A isto, engadimos a creación dunha historia modular, realizada con imaxes das súas casas e casas abandonadas da zona, enriquecendo o patrimonio cultural da zona. 

Con todo este traballo mesturando a creatividade, a fotografía e o patrimonio familiar e cultural da zona damos por finalizado este proxecto.

Para o vindeiro trimestre investigaremos sobre...os oficios! 

Agardamos que vos guste!

VISITA AO CEIP PINTOR ROSALES (MADRID): PROGRAMA OBSERVA-ACCIÓN MENTOR-ACTÚA

Cinco docentes do CPI Plurilingüe Virxe da Cela visitaron o CEIP Pintor Rosales, na comunidade autónoma de Madrid (xoves 14 de venres 15 de marzo de 2024), dentro do Programa Observa-Acción  (Galicia) e Mentor-Actúa (Madrid). Durante as xornadas do xoves e do venres estas docentes visitaron as instalacións, realizaron observacións nas aulas, coñeceron os proxectos máis destacados deste centro madrileño e intercambiaron reflexións co profesorado do CEIP Pintor Rosales. No mes de abril o CPI Virxe da Cela exercerá como centro anfitrión, dándolle a oportunidade a un grupo de cinco docentes do CEIP Pintor Rosales de coñecer o noso contexto educativo. A través de esta experiencia de intercambio trataremos de descubrir elementos que servan para transferir na nosa práctica docente e así mellorar a calidade do noso traballo para que repercuta no conxunto. 

Planificación Mentor Galicia 14 y 15 Marzo by veracruces on Scribd

REUNIÓN OBSERVA-ACCIÓN

 Profesorado do CPI Virxe da Cela participante no Programa Observa Acción que realizará próximamente (13, 14 e 15 de marzo de 2024) a visita ao CEIP Pintor Rosales (Madrid). Reunión para preparativos. 

TRANSFORMACIÓN DE CENTROS EDUCATIVOS. ESTRATEXIAS E PROXECTOS INNOVADORES

 Escola Galega de Administración Pública Sábado 9 de marzo de 2024 . Esta xornada forma parte do itinerario de innovación. O itinerario enmárcase  dentro dun paradigma de innovación sistémica que parte da base de que a  transformación significativa só se pode levar a cabo coa colaboración e compromiso  de todos os axentes para traballar en equipo e facer do centro unha organización para  a aprendizaxe. 

Nesta actividade formativa amosaranse prácticas educativas innovadoras e  procesos de colaboración susceptibles de ser adaptados e levados á práctica noutros centros educativos.

10:15 MESA REDONDA: Innovación educativa. 

Un proceso de transformación sistémico Ainara Zubillaga Del Río Directora de Educación e Formación da Fundación COTEC (moderadora) M.ª del Camino Pereiro González Directora do CPI Virxe da Cela. Monfero, A Coruña . Ana Mª Hernández Revuelta Xefa de estudos do IES Julio Verne. Leganés, Madrid 

Georgeta Ion Profesora no departamento de Pedagoxía.

LUÍSA VILLALTA NO PORTAL DA LINGUA GALEGA

No Portal da lingua galega xa está dispoñible un novo espazo dedicado a Luísa Villalta, a escritora que será homenaxeada o Día das Letras Galegas do 2024: https://www.lingua.gal/o-galego/promovelo/dia-das-letras-galegas. Alén da súa biografía, poderedes atopar diversos recursos que están a elaborar nos centros educativos, entre eles os do Seminario Galán.

https://www.lingua.gal/o-galego/promovelo/dia-das-letras-galegas

MELLOR CANCIÓN GALEGA E PORTUGUESA DO ANO

Ata o 27 de marzo está aberto o prazo para que poidades votar en liña a mellor canción galega e portuguesa do ano 2023 en https://aritmar.gal/, dentro do proxecto aRi[t]mar, promovido pola Escola Oficial de Idiomas de Santiago de Compostela, co apoio da SXPL. Como sabedes, esta iniciativa busca divulgar a música e a poesía galego-portuguesa actuais e achegar a cultura e a lingua dos dous territorios. 

INNOVACIÓN EDUCATIVA EN DINAMIZACIÓN LINGÜÍSTICA

 Convocatoria para realizar proxectos de innovación educativa en dinamización lingüística da SXPL.

Convocatoria PIDL 2023 2024 by veracruces on Scribd

LINGUA DE NAMORAR

A Secretaría Xeral de Política Lingüística (SXPL) e a Dirección Xeral de Xuventude, Participación e Voluntariado convocan unha nova edición de Lingua de Namorar. Este certame de declaracións de amor que busca dinamizar o galego entre a mocidade, nas súas relacións persoais e en Internet, está destinado a persoas con idades de 14 a 35 anos e establece tres categorías, unha delas exclusiva para Instagram. A data límite de recepción das mensaxes será o 1 de abril de 2024.

Bases Lingua de Namorar 2024 by veracruces on Scribd

REUNIÓN NO CFR DE FERROL PARA PREPARAR A MOBILIDADE DO PROGRAMA OBSERVA-ACCIÓN/MENTORACTÚA

 Luns 26 de febreiro 2024. As profesoras do CPI Virxe da Cela que van realizar a mobilidade a Madrid para facer a observación no CEIP Pintor Rosales, acuden á reunión realizada polo CFR de Ferrol para organizar a viaxe.

REUNIÓN DO PROFESORADO PARTICIPANTE NA III FASE DO PROGRAMA OBSERVA-ACCIÓN

 Luns 26 de febreiro de 2024. Aula Ferraganchos. Profesorado das tres etapas educativas (EI, EP e ESO) do CPI Virxe da Cela inscrito no programa Observa-Acción, reúnese para definir o traballo durante as vindeiras semanas. Revisar os materiais da observación, participar no panel de reflexión, preparar a mobilidade a Madrid que terá lugar os días 13, 14 e 15 de marzo e organizar como centro anfitrión a acollida do CEIP Pintor Rosales, que visitará o noso centro os días 9, 10 e 11 de abril de 2024.