Enreguéifate!! é un certame de regueifas que organizan os concellos de Ames, Carballo, Santiago e Teo coa denominación ENREGUÉIFATE!, Dentro do certame existe unha categoría xeral e outra escolar. Esta última está dirixida a alumnado de centros educativos galegos, polo que queremos involucrar o máximo número posible de estudantes e docentes, entendendo que a regueifa é unha práctica con moitas potencialidades no contexto educativo (entre elas, a dinamización da lingua galega).
A participación concrétase enviando un vídeo (máximo 3 minutos) no que saian, cando menos, dúas persoas regueifando en lingua galega. O envío realízase directamente dende a páxina web www.enregueifate.gal (Certame > Edición 2018), onde se atopan tamén as bases completas e o formulario de inscrición.
Así pois, convidámosvos a que animedes ao alumnado do voso centro a participar no certame Enreguéifate, así como a asistir ao festival Regueifesta o 2 de maio, no que se entregarán os premios do certame e haberá, ademais, un amplo programa arredor de diversas formas da improvisación oral con participación de escolares de todo o país.
Para calquera consulta, podedes dirixirvos á organización a través deste correo electrónico e tamén podedes seguir de preto o proxecto Enreguéifate a través da súa páxina de Facebook.
