UN PERCORRIDO POLA HISTORIA DO BAILE MODERNO

Ofertado polo Concello de Monfero, e dentro da programación cultural da Deputación da Coruña, o alumnado do CPI Virxe da Cela tivo a oportunidade de recibir un divertido e interesante obradoiro sobre a historia do baile moderno (martes 16 de decembro de 2013). Unha voz en off narraba en lingua galega todas as etapas que tiveron lugar no desenvolvemento do baile moderno durante as pasadas décadas, explicando con todo detalle as súas características formais e estilísticas. Dúas bailarinas danzaron ao ritmo dos diferentes estilos que se ían sucedendo, ilustrando con todo detalle a evolución deste estilo de baile que ten as súas orixes nos barrios máis humildes da Norteamérica dos anos setenta e oitenta. Debemos facer unha mención moi merecida a un grupiño de alumnos e alumnas que se atreveron a aprender algunhas das coreografías para interpretar diante de todos os seus compañeiros/as. 

OBRADOIRO DE CREATIVIDADE

O pasado venres día 19 de outubro de 2012, todo o alumnado da ESO participou dun interesante obradoiro de creatividade ofertado ao centro polo concello de Monfero. Baseado na cultura hip-hop, este obradoiro ofrecía diferentes ferramentas para fomentar a creatividade dos rapaces e rapazas, tanto a través da palabra, da imaxe, do son ou do movemento. Esta actividade incluiu un mini concerto didáctico, sucedéndose varios temas musicais e intercalando explicacións da cultura HIP-HOP. Posteriormente os rapaces e rapazas redactaron versos para construír o texto que daría lugar a un tema interpretado en estilo RAP. Tamén tiveron a oportunidade de expresar mensaxes a través da elaboración dun GRAFFITI colectivo. O broche final foi unha exhibición de baile BREAK-DANCE. Parabéns para os dous alumnos de 4º da ESO que tomaron parte desta actuación, amosando a súa arte nos movementos e as súas capacidades físicas na execución de acrobacias.