OLLOBOI 2018

Xa temos programa para o Olloboi 2018. O Encontro transcorrerá ó longo do venres 11 de maio.

 • Pola mañá desenvolverase a Muchachada Matiné: roteiro socioaudiovisual por Boiro onde grupos de rapaces/as crearedes micropezas xunto a cineastas, co soporte da A.C. Unión de Muchachas. A inscrición na actividade está aberta a alumnado de toda Galicia, é de balde, e suporá traballar en pequenos grupos coa presencia dun profe acompañante. Os cineastas cómplices deste ano son: Sandra Sánchez, directora de Tralas Luces; Alfonso Zarauza, director de Encallados; María Yáñez e Sonia Méndez, do Carballo Interplay; Miguel de Lira, actor e guionista de Crebinsky; Andrés Goteira e Suso López, de Dhogs. Se hai moitas inscricións, incorporaranse cómplices ;) 

• Pola tarde realizarase un CineForum no que as directoras do festival Carballo Interplay nos achegarán o mundo das series web e youtubers; a continuación, Sabela Hermida e Fede Pérez presentarán a gala de entrega de premios. Como o ano pasado, remataremos o festival cunha pequena festa-foliada e logo un concerto na Pousada das Ánimas (Sabela King and the Heartbreakers). 

FESTIVAL AUDIOVISUAL OLLOBOI

Ábrese o prazo para participar en Olloboi! Desde hoxe e ata o 30 de abril alumnado e profesorado pode inscribir as súas curtas escolares en Olloboi.com. Estreamos páxina web e nela atópase, ademais do formulario e bases desta edición, as curtas gañadoras de cursos pasados e interesantes recursos para elaborar unha peza (actividades e charlas con profesionais en Aprendo con Olloboi, das que avanzamos unha pequena píldora co Olloconsello de Miguel de Lira). Hai recoñecemento á mellor curta de Infantil e Primaria (categoría Peque), e á mellor de Ensino Superior (Plus18). Ademais, o noso Xurado outorgará premios á mellor montaxe, interpretación, fotografía, guión, son e arte. A entrega de premios terá lugar o venres 11 de maio dentro dos actos do Encontro Olloboi. Inscríbete xa na nosa web! Enviaremos máis información sobre o Encontro en vindeiras comunicacións. Así que... a divertirse, crear e compartir!

Bases olloboi 2018 de satelite1