O xoves 24 de decembro tivemos a oportunidade de conectarnos vía Skype coa base española Gabriel de Castilla, situada na Illa Decepción, na Antártida. Entre os militares e científicos que traballan nesta estación española atópase Xavier Cristobo, un aresán que a parte de mergullarse nas xélidas augas polares, leva anos inmerso no mundo da investigación biolóxica, sendo na actualidade o director do Centro Oceanográfico de Xixón. Veciño e amigo da nosa profesora aresá Yolanda Castro, aceptou a petición desta compoñente do Equipo de Dinamización da Lingua Galega para transportar a nosa lingua alende os mares, e con grande simpatía e coñecemento, contenstou cada unha das preguntas formuladas polos rapaces e rapazas da ESO, e, como non, ás de María Xosé Fandiño, a profesora de Ciencias Naturais. Xavier Cristobo recibiu os parabéns de todos asistentes a esta videoconferencia, e esperemos que este non sexa máis que o primeiro contacto dunha colaboración máis duradeira. Recorda Xavier que estás convidado a visitar o noso centro cando voltes a Galicia, e poder contarnos todas as túas aventuras e andainas ao carón dunha estufiña... Deixamos pendurado no blogue un dossier con máis datos sobre este interesante proxecto da Antártida e os fermosos debuxos do caderno de bitácora de Xavier Cristovo, que tanto evocan o diario do afamado Charles Darwin na súa travesía a bordo do Beagle...
![](https://blogger.googleusercontent.com/img/b/R29vZ2xl/AVvXsEh7UBxUJ_KHxe1FyrZGavoKj7bU2NEgxCm5T5r5bZP2JJ-n7lzarx3Wx8DLcR-Z-Uwa-8gE_MaYZqBUXxW5R9X_02ltcVkd6PezNWDJe0ya5QxCKQ9KfskEyMdmdP3E5c5Gxu7EhZgIXnQy/s320/IMG_0695.JPG)
![](https://blogger.googleusercontent.com/img/b/R29vZ2xl/AVvXsEgYekReANqAOz8jMbudW7P2Rr1z_fiOX4fVFTxCMK01QqYqlIVyJonF46iI13lTFIOo9zozCGmmysSHYahv3WIQflpBmGjC6FP6mENNwJNrfW9j8_71Bfwvs9G3MF2WkC2K9xRsfu3uyENB/s320/IMG_0718.JPG)
![](https://blogger.googleusercontent.com/img/b/R29vZ2xl/AVvXsEhRgbI_GZG3GUd7uZN4Sa8dnMQPt1yxqVhm1TLbzG9ECGvxsw83xZr0bHBsQul014jT84JuwLL8mvfuOvYDh9RsPd5Ugd1UJGOoZAu8b84ICfpllDibbrOHvHPiOrqFnv5OVKNZ5jUGRxio/s320/IMG_0706.JPG)