II CONCURSO DE FOTOGRAFÍA "GALICIA, AUGA E LITERATURA"

Convócase o II Concurso de Fotografía "Galicia, Auga e Literatura", patrocinado por Viaqua.

Podedes participar cos vosos alumnos enviando os traballos ata o próximo 10 de maio ao seguinte enderezo:

II Concurso de Fotografía “Galicia, Auga e Literatura”

La Voz de Galicia

Departamento de Marketing

Polígono Industrial de Sabón

Avenida da Prensa, 84 – 85 15143 Arteixo (A Coruña)

O que se busca con este concurso é achegar a literatura galega aos escolares de Educación Primaria e Secundaria a través da auga; á vez que se conciencia sobre os usos e beneficios desta.

E como se consegue isto?. Os alumnos deberán elixir un poema ou verso determinado nos que a auga estea presente e ilustralo cunha fotografía. A creatividade e orixinalidade á hora de plasmar nunha fotografía a importancia do coidado do medio ambiente e a auga como recurso escaso, terán a súa recompensa. En concreto, o primeiro e segundo premio para os escolares de cada categoría será unha Tablet Nevir LCD 8" e unha Cámara Dixital Nikon, respectivamente. Os profesores, pola súa banda, serán galardoados cunha estancia dunha noite para dúas persoas en OCA Augas Santas (Pantón - Ourense).

Se tes calquera dúbida, xa podes consultar as bases do concuso que tes acontinuación:

Bases concurso gal from Yolanda Castro

BOOK TRAILERS 2015-2016

Co obxectivo de potenciar a creatividade e a imaxinación do alumnado o Departamento de Lingua Galega, propón a realización de booktrailers. Esta actividade consiste na elaboración de publicidade en formato audiovisual para promover a lectura en galego. Podedes ver na seguinte lista de reprodución os book trailers que fixeron os alumnos/as da ESO neste curso, para publicitar a obra literaria do escritor vigués Francisco Castro.

NÓS TAMÉN CREAMOS

A Secretaría Xeral de Política Lingüística xunto coa Dirección Xeral de Educación, Formación Profesional e Innovación Educativa en colaboración coa Corporación de Radio e Televisión de Galicia e OQOeditora convocan, un curso máis, a V edición dos premios a curtas de animación Nós tamén creamos! O certame está dirixido a alumnado de educación infantil e de primeiro a cuarto de educación primaria. O prazo para presentar as solicitudes remata o día 8 de marzo.

 

Nós tamén creamos from satelite1

CHARLA LITERARIA CON FRANCISCO CASTRO

    Hoxe, o escritor Francisco Castro visitou o CPIP Virxe da Cela para un coloquio literario co alumnado de Monfero e Irixoa sobre tres dos seus libros: “O neno can” (do que tamén é coautora Fina Casalderrey), “Chamádeme Simbad” e “O corazón da Branca de Neve”.

    No transcurso da actividade, o escritor vigués desvelou algunhas das claves do proceso de creación literaria e respondeu ás cuestións dos cativos e cativas da ESO sobre estas obras da súa autoría. Tamén tivo ocasión de visionar unhas curtametraxes elaboradas no colexio e inspiradas nos seus relatos. Francisco Castro declarou estar impresionado por esta iniciativa dos alumnos e felicitounos polo traballo desenvolvido a prol da promoción da lectura. 

     Finalmente, foi obsequiado cun pequeno volume editado no centro con composicións literarias e ilustracións feitas polos nenos de Irixoa e Monfero como homenaxe a “O neno can” O coloquio transcorreu nun ambiente de complicidade entre o autor e os seus lectores, dada a empatía xerada por Francisco Castro dende o primeiro momento e o interese que as súas narracións espertaron entre os máis novos.

Borja martínez charla francisco castro from satelite1

EXPOSICIÓN DRAGAL: VISITA A PICO SACRO

         Pasaron xa catro meses desde que os rapaces e rapazas de 2º e 3º da ESO do CPI Virxe da Cela visitaron o Pico Sacro, en Boqueixon, para participar na Xuntanza Final do Proxecto Dragal (venres 16 de outubro de 2015). Durante horas estivemos percorrendo pistas labirínticas do Pico Sacro, atopándonos por momentos con outros centros educativos e combatendo con ansia ate ir acadando as pedras preciosas que unha vez sumadas leváronnos ao primeiro posto deste xogo de rol. Houbo un traballo previo moi importante no que o noso alumnado investiu moitas horas: a construción das espadas e escudos que representaron ao noso centro.

Aproveitamos pois para facer unha exposición de todos estes obxectos construídos para a ocasión, que xunto coas imaxes tomadas no Pico Sacro axudaranvos a facervos unha idea do desenvolvemento da actividade, e seguro que algún/ha aproveita a ocasión para facer algunha “batalla campal” nos corredores da nosa escola! Viva a Fraternidade do Dragón!!

Crónica exposición dragal from satelite1

CONCURSO DE LOGOS

Neste ano 2016 o CPI Virxe da Cela cumpre 40 anos de historia. Debido a esta celebración levamos a cabo distintas conmemoracións e actividades. Unha actividade que pensamos que xa era o momento de facela era darlle ao colexio unha imaxe identitaria. Pensamos que o mellor era que xurdira do principal activo do colexio, e dicir dos nosos nenos, polo que convocouse un concurso de deseño do logotipo. A actividade levouse a cabo co alumnado de EP e ESO . 

Puideron participar de forma individual ou por parellas presentando un máximo de tres propostas por alumno. O Concurso tiña por obxecto a creación dun deseño gráfico que identifique o noso colexio en tódolos ámbitos converténdose na imaxe representativa do mesmo. Incentivamos as referencias que identifiquen actividades propias do centro escolar ou da súa contorna.Suxerimos imaxes sinxelas tanto na forma como na súa interpretación. Puideron utilizar calquera tipo de técnica bidimensional: rotuladores, lapis, témperas, collage, ordenador etc. O alumnado de EPV de secundaria tivo unha clase teórica sobre deseño gráfico e outra de investigación persoal en internet e cos recursos bibliográficos da biblioteca. A data límite de entrega foi o 22 de xaneiro de 2016. Cos traballos recollidos fixemos unha exposición e votaron representantes de todos os membros da comunidade educativa para seleccionar o gañador.

1º Premio: Nerea Couceiro Gómez de 4º de ESO

Premio espEcial de Educación Primaria: Xiana Mosquera Varela, de 3º de EP
Premio especial de ESO: Silvia Roca Deibe de 4º de ESO

ENTROIDO 2016

      Son moitas as promocións de alumnos/as que xa saíron do noso centro, e todos e cada un deles conservan moitas e variadas lembranzas da súa etapa estudantil. Mais todos/as coinciden en que a celebración de Antroiodo queda sempre gravada na súa memoria, acompañada por infinidade de imaxes e instantáneas cheas de colorido e alegría. 

    Un ano máis chega o esperado Antroido, cos doces típicos e unhas merecidas e desexadas vacacións, pero non sen antes celebrar un espectacular desfile de disfraces. “Culturas do Mundo” é a temática elixida nesta ocasión, cun achegamento no que predomina o continente americano. Música, bailes, actuacións en directo, aplausos e moitas risas. Infantil da o inicio ao festival co seu número “Que veñen os indios monferinos procedentes da tribu do tambor”, seguidos dos “Vaqueiros de primaria” (1º 2 º EP), os “Indios taínos” (3º e 4º EP) e finalizando cunha divertidísima regueifa mexicana dos rapaces/zas de 5º e 6º de EI titulada “Rifa de Namorados”. 

    Acto seguido dan paso as actuacións de secundaria introducidas polo xa coñecido “Desfile do Dragón” (1º ESO), un interesante e educativo desfile que fai un minucioso repaso desde os albores da civilización ata o nosos días bautizado “Comecemos desde o principio” (2º da ESO), a obra teatral “Mandarina” do alumnado de 3º da ESO, que vén sendo unha segunda parte da divertida saga familiar “Noiteboa” interpretada no pasado festival de Nadal. O broche final o pon o alumnado de 4º da ESO co seu número circense cheo de malabarismos e cabrioletas “O circo ía e viña”. 

      Chegan os premios, moitos e variados, e para deixarnos a todos un bo sabor de boca rematamos coa esperada degustación de chocolate quente, churros, rosquillas e outros doces típicos do Antroido. 

 PREMIOS ENTROIDO 2016 

Educación Infantil 
Premio pola actuación ás dúas aulas de infantil.
Educación Primaria
Premio aos mellores disfraces outorgado a: Grupos de 5º e 6º.
Premio á actuación máis orixinal outorgado a: Grupos de 3º e 4º.
Premio á mellor actuación outorgado a: Grupos de 1º e 2º.
Educación Secundaria 
Premio aos mellores disfraces outorgado a: Grupo de 1º .
Premio á actuación máis orixinal outorgado a: Grupo de 2º.
Premio aos máis divertidos outorgado a: Grupo de 3º.
Premio á mellor actuación outorgado a: Grupo de 4º.

           

Crónica entroido 2016 from satelite1

PROGRAMACIÓN FEBREIRO REDE CULTURAL DEPUTACIÓN CORUÑA

Vinilo programacion febreiro_2016 (1) from satelite1

Programa febreiro 2016 2 from satelite1