VOCES SILENCIADAS. LUGARES DE MEMORIA

 

“SEMANA DA REPRESIÓN” EN MONFERO

 Durante a semana do 24 ao 28 de novembro, o alumnado de 4º da ESO recibiu no centro a varios especialistas sobre cuestións relacionadas con diferentes ámbitos da represión franquista no século pasado. Estas charlas están enmarcadas dentro do seu proxecto de trimestre para a materia de Xeografía e Historia, titulado “Voces silenciadas. Lugares de memoria. Violencia e represión nos concellos de Monfero, Irixoa, Aranga e Vilarmaior entre 1936 e 1949”.

O primeiro en asistir foi o arqueólogo Serxio Castro, da Asociación para a Recuperación da Memoria Histórica, quen lles fixo unha exposición sobre o proceso de exhumación dunha fosa común. O alumnado puido compartir con el ata tres sesións de 50 minutos nas que foron descubrindo diversas curiosidades de arqueoloxía forense e tamén se interesaron por saber como poderían facer eles como particulares para iniciar a solicitude de exhumación dos restos que teñen localizados a través de diversas entrevistas orais aos veciños do Concello de Aranga.

O venres 28, ás 12:35, acudiron á biblioteca o ilustrador Carlos Sardiña, o xornalista Pablo Santiago, a profesora e investigadora Anxos García Fonte e o historiador Enrique Sanfiz para presentar o libro titulado A morte nas Fragas, que narra a historia de represión de Pedro Rico e Constantino López, veciños da parroquia de Taboada, en Monfero. Visualizaron o documental e puideron observar en directo a creación artística de dous impresionantes debuxos feitos a carbón de Carlos Sardiña. Posteriormente, compartiron con Pablo Santiago unha charla sobre o seu traballo explicándolles diversos acontecementos e sucesos que están aínda a investigar.

Por último, á tarde, de 15:35 a 17:30 h tiveron unha dinámica para traballar a oratoria de cara á próxima presentación do seu traballo con Oladapo Oladipo, profesor do Colexio Internacional de Eirís, que lles deu as claves para realizar unha exposición oral controlando os nervios, os tempos e as emocións.

ACTUACIÓN MUSICA TRADICIONAL ALUMNADO CPI VIRXE DA CELA

O pasado 19 de novembro de 2025, os meus compañeiros de 4º da ESO, moitos deles pertencentes ao Grupo Folclórico Virxe da Cela  e máis eu tivemos que ir a tocar como sustitutos nun acto levado a cabo en Pontedeume en conmemoración ao Día dos Dereitos da Infancia. Foi para o meu parecer algo novo, debido a que no lo dixeran 18 horas antes, pero preparámolo ben e conseguimos pasar do 5, como quen di. É certo que faltounos afinar as gaitas, cousa que se notaba moito, pero polo resto foi fluído. Fora da nosa actuación, todo foi moi interesante. Falaron distintas persoas, entre elas o noso director, e pois unha cousa que me quedou foi que Nerea, unha das organizadoras de Euroeume, fora a nosa profesora en 6º de mecanografía. Foi un reencontro peculiar. Nuno González, 4º ESO.

DIPLOMAS PARA ALUMNADO DA ESO COLABORADORES/AS NA XORNADA SAMAÍN

 

VISITA Ó MUSEO DAS MARIÑAS E O LAVADOIRO DE BETANZOS

 O mércores 4 de decembro, o alumnado de terceiro e cuarto de Educación Primaria visitou o Museo das Mariñas e o Lavadoiro Modernista de Betanzos para coñecer un pouco máis o oficio das lavandeiras, os traxes tradicionais e a exposición de Xoana Abraira: "O oficio de lavar" a partir da cal o alumnado elaborou a súa propia exposición para o 25N. 

Todo isto enmarcado dentro do noso PDI "TIRANDO DO FÍO". 

Renovación do patio de infantil

Boas familias! Como xa vos comentamos estamos a realizar obras no patio de infantil atendendo na medida do posible as necesidades do alumnado e as súas peticións. Xa fixemos varias reunións onde varias familias estiveron a colaborar nesta gran tarefa. A continuación, vos detallamos as actas onde se explica polo miúdo todas as accións a desenvolver e todo o que se fixo. Aquí amosamos unha mostra:

ACTA 1

ACTA 2 

ACTA 3
 

Seguiremos informando do proceso. O vindeiro mércores 27 de agosto terá lugar a derradeira reunión para rematar na medida do posible todo, antes da chegada do alumnado. 

 Grazas a todos e todas por colaborar! sen vós non sería posible! Un saúdo.

Unha gradación chea de emoción e ledicia: 4º da ESO despide unha etapa inesquecible

 Unha gradación chea de emoción e ledicia: 4º da ESO despide unha etapa inesquecible

Este venres vivimos un acto de gradación cargado de sentimentos. O alumnado de 4º da ESO do CPI Plurilingüe Virxe da Cela celebrou o peche dunha etapa fundamental das súas vidas, rodeado de familias, profesorado, compañeiros e compañeiras e representantes dos concellos de Monfero e Irixoa.

Tras semanas de esforzo, exames e dedicación, chegou o momento máis agardado: despedir un capítulo cheo de aprendizaxes, amizades e vivencias que  acompañarán para sempre. Entre as paredes do noso centro, estas rapazas e rapaces medraron, e hoxe levan consigo a pegada imborrable da súa casa educativa.

A cerimonia foi un reflexo das súas traxectorias: nervios transformados en orgullo, alegría mesturada con agradecemento. Compartimos palabras fermosas, lembramos anécdotas, sorrimos... e mesmo algunha bágoa, porque despedir o vivido nunca é doado. A mesma, organizada polo alumnado de 3º da ESO e polo profesorado do centro con moito agarimo.

Imaxe autoeditada dos momentos finais da celegración.

Desde o CPI Plurilingüe Virxe da Cela:

Queremos expresar o noso máis sincero grazas. Grazas por compartir este camiño, pola vosa ilusión e pola marca que deixades nestas aulas. Que esta casa siga sendo sempre o voso fogar.

Á promoción 2025:

Desexámosvos toda a sorte do mundo nesta nova etapa. Enfrontádea coa mesma valentía e forza que vos trouxo ata aquí. E recordade: as nosas portas estarán sempre abertas. Porque, máis aló do tempo, sodes parte imborrable da nosa historia.

Boa viaxe, querida promoción. Ata sempre.

Imaxe autoeditada dos momentos finais da celegración.