OBRADOIROS TALENTO MOZO

O Luns 22 de maio 2023 o alumnado de 3º e 4º da ESO recibe a visita de dúas mozas galegas con experencia en diferentes ámbitos profesionais para relatar a súa experiencia vital e laboral, dentro do progama Obradoiros Talento Mozo 2023. Sara Fraga Pérez ten 27 anos e está enfocada profesionalmente ao mundo da xestión cultural  e Alexandra Kus ten 28 anos e traballa como  coordinadora da sección de marketing dixital nunha importante firma galega. Ambas explicaron ao alumnado presente na charla como foi a vida marcando o seu itinerario académico e guiando a súa carreira profesional, aportando moitísimas claves para animar aos mozos e mozas a descubrir cales son os seus talentos e paixóns para ser quen de no futuro gañarse a vida con algo que lles de ademais de sustento un elevado grado de felicidade e satisfacción, sen olvidarnos do factor humano e as relacións cos outros. 

 

 

O programa Obradoiros Talento Mozo 2023 é un programa de educación non formal no ámbito educativo que tratará de visibilizar a creatividade, a innovación e o impulso da xente moza a través da realización de 30 obradoiros en centros de educación secundaria obrigatoria repartidos polas catro provincias da Comunidade Autónoma de Galicia. O obxectivo do programa é dar a coñecer traxectorias relevantes de mozas e mozos galegos que pola súa creatividade, innovación e impulso destacan profesionalmente en ámbitos diversos, á vez que se pretende estimular e incentivar a análise e reflexión no alumnado receptor.Obxectivos específicos Os obxectivos específicos do programa son: 

• Expoñer experiencias próximas e reais da mocidade que amplíen o campo de referencia para o alumnado participante. 

• Resolver dúbidas do ámbito laboral por parte dunha persoa que actualmente traballa ou se formou naquilo ao que o alumnado se quere adicar. 

• Falar dos problemas, así como das posibles solucións, que lles xurdiron aos mozos e mozas participantes e que lles fixeron chegar ata onde se encontran hoxe en día. 

• Coñecer cal é o estilo de vida, o día a día ou os futuros retos das persoas relatoras co fin de xerar un espazo de confianza e próximo co alumnado. 

• Fomentar a participación real dos alumnos e alumnas durante o desenvolvemento do programa. 

• Promover o desenvolvemento das habilidades persoais dos participantes.