CATAPALABRAS

A Asociación Sociopedagóxica Galega (AS-PG) amplia a súa oferta de xogos educativos na rede co Catapalabras, un xogo no que poden participar de dous a catro xogadores que consiste basicamente en que cada quen escriba palabras que encaixen en certas categorías elixidas ao azar (froitas, animais etc.) e que comecen por unha letra determinada obtida tamén aleatoriamente a través dun dado de 20 caras.

O obxectivo é conseguir a puntuación máis elevada posible, que dependerá da cantidade de palabras correctas que se escriban e do número de persoas que escriban a mesma palabra, xa que as palabras repetidas non puntúan.

Este xogo vense sumar ao Trivial, ao Letrad@s e ao xogo da Curuxa, todos eles cun alto índice de aceptación e participación, e pretende contribuír a galeguización dun espazo vital, o do lecer e o xogo, que na actualidade sofre unha importante carencia de posibilidades pensadas desde Galiza

O xogo, as características, normas e demais pode verse na ligazón:

www.as-pg.com/catapalabras/login.htm.

MATERIAIS PARA AS LETRAS GALEGAS 2010

A Coordinadora Galega de ENDL ofrece na súa páxina un monográfico especial sobre a figura e a obra de Uxío Novoneyra, autor homenaxeado no Día das Letras Galegas 2010.http://www.coordinadoraendl.org/letras2010/uxio.php Compilación de recursos web como actividades en liña e unidades didácticas para diferentes niveis educativos ou unha fonoteca e unha videoteca, entre outros. Este monográfico ha de ir incorporando novos materiais elaborados polos docentes nos centros escolares e por diferentes colectivos e institucións.

Seminario de Galán ofrece tamén materias na súa páxina http://seminariogalan.org, que contén actividades e recursos para o alumnado de infantil e os tres ciclos de primaria, en formato PDF, sobre Uxío Novoneyra, autor homenaxeado no Día das Letras 2010. Nesta mesma web inclúese unha biografía do autor, tamén en formato PDF, unha pequena galería fotográfica e varios paquetes de actividades interactivas en Edlim e JavaClic para infantil e primaria.

CONCURSO LETRAS GALEGAS 2010

O Equipo de Nomalización e Dinamización Linguística do C.P.I. Virxe da Cela, en colaboración co Departamento de Lingua Galega, organiza un concurso para conmemorar o Día das Letras Galegas, tratando deste xeito potenciar e fomentar o uso da lingua galega, tanto na fala como na escrita.

Concurso letras galegas 2010

View more documents from satelite1.

PACO BARROS, "En galego pintamos"

O CPI VICENTE OTERO VALCÁRCEL DE CARRAL convoca a I edición do Concurso de Debuxos “Paco Barros, en galego pintamos”. Este concurso ten dúas motivacións:

1-Homenaxear a Francisco Barros, compañeiro falecido recentemente, profesor durante máis de 30 anos no colexio de Carral. Paco Barros subliñouse sempre na defensa e no uso da nosa lingua. Consideramos oportuno mesturar este motivo con unha das súas principais afeccións, a pintura. Eis a razón do título do certame.

2-O segundo motivo é propiciar a reflexión sobre o uso do galego na mocidade. Como ve a nosa xuventude a situación do idioma? En que medida está presente na súa vida: no uso cotiá, na súa familia, no seu tempo de ocio, na súa música, etc. Que “pinta” o galego entre eles e elas? Que “pintan” eles para o idioma? Que futuro lle “pintan” ao galego?

BASES DO CONCURSO: “PACO BARROS, EN GALEGO PINTAMOS”

1-Poderá presentarse todo o alumnado de Galicia matriculado na ESO ou en BACHARELATO no presente curso, de maneira individual.

2-O traballo consistirá na elaboración dun debuxo que combine a seguinte temática: o galego e a mocidade. Pode consistir nun debuxo, pintura, humor gráfico, caricatura, etc. O debuxo pode ir acompañado de texto.


3-A técnica utilizada no debuxo será libre, mais o formato será mínimo un DIN A4, máximo un DIN A3.

4-O prazo de presentación dos debuxos será até o 21 de maio de 2010 ao seguinte enderezo postal:

Concurso “Paco Barros, en galego pintamos”
CPI Vicente Otero Valcárcel
Rúa Juan Seijas s/n
Carral (15175)
A Coruña

5- O autor/a enviará o debuxo dentro dun sobre. No remite do sobre figurará o título do debuxo e un pseudónimo do autor/a. O debuxo non poderá ir asinado, figurando o pseudónimo no reverso. Dentro do sobre incluirá outro sobre de menor tamaño. No interior deste sobre máis pequeno figurará unha fotocopia do seu DNI e o pseudónimo do autor/a, enderezo electrónico e un número de teléfono.

6- Establécese un único premio de 300 € e a reprodución dunha pintura de Paco Barros.

7-O xurado estará composto polo Director/a do CPI Vicente Otero, o Xefe/a dos Departamentos de Lingua Galega, Artes Plásticas e a Coordinadora do Equipo de Normalización e Dinamización Lingüística.

8- A decisión do xurado comunicarase na páxina web do centro educativo (http://centros.edu.xunta.es/cpivicenteoterovalcarcel/) o 4 de xuño de 2010. Igualmente, será comunicada persoalmente ao gañador/a.

9- O premio poderá ser declarado deserto e o fallo do xurado será inapelable. O debuxo que resulte gañador quedará en propiedade do centro, que poderá reproducilo libremente sen que tal reprodución implique dereito algún para o autor/a.

10-Os concursantes que se presenten deberán ser responsables da súa obra, que será única, orixinal e propiedade do autor/a.

11- Coas obras presentadas celebrarase unha exposición no centro educativo, desde o 5 ao 22 de xuño de 2010.

12-Os debuxos non premiados poderán ser retirados persoalmente polos seus autores no prazo de 20 días naturais comezados a contar desde o seguinte ao remate da exposición. Pasado ese prazo quedarán en propiedade do colexio, que poderá dispoñer deles sen dereito ningún a reclamación.

13-Toda persoa que concurse acepta integramente as bases do concurso.

CONVOCATORIA DE PREMIOS

Achegámosvos información sobre varias convocatorias encamiñadas ao fomento, difusión e creación da lingua e cultura galega. Tedes á vosa disposición as bases destas convocatorias no taboleiro de informacións.

XVI Premio de Poesía Avelina Valladares. Creación e difusión da lírica galega.

XV Premio Xornalístico Manuel Reimóndez Portela

XXII Premio de Novela M. García Barros.

ORGULLOSOS/AS DO NOSO, ORGULLOSOS/AS DA NOSA LINGUA

Orgullosos/as do noso, Orgullosos/as do galego, é unha campaña posta en marcha pola CGENDL, que pretende transmitir no seo da comunidade educativa, e no conxunto da sociedade, un sentimento de orgullo pola lingua propia como sentimento común de todos os galegos á marxe da orixe, a ideoloxía, o credo ou a idade de cadaquén. A lingua galega é un elemento de unión e un rico patrimonio de futuro que nos dota de identidade e nos conecta con millóns de persoas en todo o mundo.

Como se pode participar dende os centros escolares?

a.Envío de vídeos e textos “orgullosos”:

Ao igual que un grupo de personalidades da cultura galega expresan o seu orgullo e a utilidade do galego nos dous vídeos de lanzamento, animámosvos a gravar vídeos e redactar textos nos que se exprese ese orgullo de contarmos co galego. E animámosvos a enviárnolos para seren compartidos na web. Isto non é un concurso, isto é unha campaña colaborativa feita entre todos e todas, unha pequena gran obra colectiva, o importante é participar, traballar co alumnado e lanzar esa mensaxe orgullosa. A creatividade está na comunidade educativa e as dificultades técnicas están aí para lles facer fronte: cunha cámara, un móbil ou calquera dispositivo audiovisual podedes elaborar o voso traballo.

b.Difusión do material gráfico da campaña:

Na web da CGENDL ponse á disposición de todos os ENDL e do profesorado un material gráfico (camisetas, chapas, carteis, adhesivos, etc.) que se pode descargar de balde para a súa distribución.

OUFF ESCOLA. II Certame de Cinema 2010

Portada do DVD que contén os traballos gañadores no I Certame OUFFESCOLA 2009

O Consorcio do Festival Internacional de Cine Independient4e de Ourense (OUFF), a Secretaría Xeral de Política Lingüística e a Concellaría de Normalización Lingüística do Concello de Ourense convocan o II Certame de Cinema OUFF Escola 2010, dentro da XV edición do Festival de Cine Internacional de Ourense.

O II Certame de Cinema OUFF Escola nace co obxectivo de impulsar o uso do idioma galego entre a mocidade, coñecer a visión desta sobre o seu contorno sociocultural e fomentar a creatividade audiovisual e o traballo en equipo, nunha linguaxe atractiva para o alumnado, que contribúa a xerar un espírito crítico.

Este certame pretende3, así mesmo, potenciar o uso das tecnoloxías da información e a súa comunicación nos centros de ensino e crear un espazo de referencia para a motra do audiovisual feito nas aulas.